قط و فار !!!

دنيا ملانة بالأسرار
وأجمل حاجة
أما بيلعب قط وفار
وأسوأ حاجة
أما اللعب يكون بالنار
تيجوا نفكر مع بعضينا
أما إتنين يحرقوا في سفينة
وألا أسيب فكركوا يحتار
بين القط وبين خربشته
وبين الفار آخر المشوار
..................
مَرَّة الفار يشتاق للقط
ويعمل حاوي ويجري ينط
ومرات تانية يهز ف ديله
يروح يمسكه وبسرعة يفط
......................
أدام الناس الإتنين أكبر أعداء
ضرب في بعض خصام وفراق
وجوة الأوضة شوف الأشواق
حضن في حضن وبوس وعناق
أتاري الفار بيحب القط
والمصلحة محتاجة لوفاق
........................
عسل القط بيشفي الفار
ولعب الفار بيحبه القط
والأسرار بتحب اللعب
والإتنين لعيبة كبار
......................
واد لعيب إنما إيه
يلعب باشا ويلعب بيه
ويلعب لو على عشرة جنيه
ويلعب كُومي ويجري يِقُشْ
ويلعب بَصْرَة ساعات ويغش
وساعات تانية يسيب اللعب
يروح للأكل يعبي الكِرْش
........................
ألف خسارة
لما تكون اللعبة بمصر
الاتنين عاملين أبطال
وبيرفعوا في علامة النصر
واحد يضرب بالملايين
وواحد عايش عمره في قصر
ومصر الغالية ما بين الاتنين
عايشه في هم ومعصورة عصر
.....................
وشعب الغالية ياعيني عليه
غلبان غلب
ونص الشعب يمد إيديه
لو ملايين الفار تتوزع
كان القط هيعمل إيه
......................
كانوا الإتنين خلصوا على بعض
ولا فيه كلمة ولا في الأوضة
كان الوعد وكان العهد
وكنا قلبنا اللعب جنازة
وتشوف فار مقتول في جوازة
وتشوف قط مسممه شهد
وتبقي ساعتها مصر تفوق
وأزمة تعدي وبرق ورعد
.......................
الوقت بيجري يعدي قوام
زي ماعدت ثورة وشهدا
وعيش حرية وكُتر كلام
عالملايين سلم واتعلم
سلام للفار وسلام للقط
وإنتي يا مصر ألف سلام
ألف سلام .. ألف سلام .. ألف سلام