استر ياللي بتستر
نازل الساحة جديد
جاي بأوامر عليا
جاي حسب المواعيد
راكب فرسه الأبيض
ومعاه كحك العيد
...................
قبل ما تشغل نفسك
مين هيفوز وهيغلب
اوعى تاخودها تحدي
لا تفكر ولا تتعب
عنتر شايل سيفه
شاطر نزل الملعب
..................
احنا الحق معانا
خلاص نازلين الساحة
قوموا كلكوا ويانا
بجردل وبمساحة
امسحوا كل البعدا
مش محتاجة فصاحة
..................
الريس متعين
بقرار حسب الموضة
والأيام هتبين
خدناه جوه الأوضة
بسم الله مش هين
بين خبرة ولماضة
......................
دا اللي هينقذ مصر
جاي هيفتح عكا
قبل مايدخل قصر
هيعلق على مكة
بإيده علامة النصر
شعبه هيبقى ملايكة
...................
قبل ماتشغل نفسك
وتقول حزر فزر
أنا باتكلم جد
عمري ما كنت بهزر
والشاطر بقى فيكوا
في العفاريت هيحضر
...................
مصر لاعاوزة العمة
ولا عاوزة شيخ منصر
عاوزه شريف وعداله
نهتف له ونكبر
شعر د هاني أبوالفتوح
الكويت – 1 ابريل 2012
اسْتُرْ يَاللي بْتُسْتُرْ
2012-04-03
6377 قراءة
د- هاني ابوالفتوح
التعليقات والردود
0لا توجد تعليقات أو ردود على هذا المقال حتى الآن