يا روح الروح !

ساعات أفضفض وبتكلم
وأقول جايز يروح همي
ألاقي نفسي بتعافر يفور دمي
بخبي ورا الضحكة بحور ألم
ومين يسمع ومين يرحم
ومين بيشوف
وكل حاجة يا مصر على المكشوف
يا خسارة و ألف خسارة يا بلدي
ماليك الخوف
ويا خسارة هناك زيي كتير ساكتين
سلاحها حروف
مصر عاوزه الأمل ... عاوزه العمل
يجدف ويا صبرها
و يغزل من دواها الصوف
مصر ألف بيزرعوا
و ملايين تانيه بيقلعوا
واحد يداوي لكن يوجعوها ألوف

............................

عارفه يا مصر بقيت أنزل كل شهرين ليه ؟
بأشم نسيمى جواكى
وقلبي عليل بيهواكي
ولما أبعد تروح روحي
برجع تاني وألقاكي
علي ميعادي
لكن كل مرة أشوف روحك بتطلع
كأنه خلاص دا العادي

...........................

بقيت أشوف وشوش مش مننا
وشوش غير الوشوش
شكل البشر لكن وحوش
طلعوا منين ما تفهموش
العيب في مين ؟
في الصمت ولا في ظلم السنين
يا ألف خسارة يا مصر
لو تاهت ولو باخت ولو شاخت
بعمر النيل
وبسأل فين ؟
شباب الدنيا وشموخها وغنى المواويل
ولو شاخت يبان الحزن في لونها
في وسط ميدانها وأحزانها
بقت واقفة هناك عالشط تستنى
بتنزف ألم بتبكي ألم وتشكي نغم
وأنا في الضلمة أقيد شمعة
أقول تاني أنا جايلك
بس عهد الله عليكي
إرسمينى وإرسمى في إسمك يمينى
إحلفي بالله تعالي وحلفيني
إننا بنحب بعض
بس بعض البعض منا
ليه في وقت الشدة يقلع نن عيني ؟

.............................

يااااااه عالغنا تحت البكا
والكتابة بالدموع
والصلاة ويا الخشوع
أيوة يابلد أنا هنا عاشق الرجوع
غريب عنك وجواكي
ومين هيداوي في جرحك
ولو ينساني ينساكي
بعذب روحي من حضنك
وبتمرمغ
عشان عاشق صبابة الحب وياكي
من فضلك ممكن طلب ....
تداوينى
عشان عارفه منين الجرح يكوينى
يا روح الروح
فداك روحى .....
فداك قلبي ......
فداك عيني .......
فداك العمر وسنيني !!

----------
كلمات : د هاني أبوالفتوح
القاهرة – الجمعه 24 فبراير 2012