أستك الإخوان ورباط الرئيس !

د- هاني ابوالفتوح - مصر / الكويت من كتـــــّاب موقع بوّابــتي
المشاهدات: 5261

يسمح بالنقل، بشرط ذكر موقع "بوابتي" مصدر المقال، ويفضّل أن يكون ذلك في شكل رابط

للأستك مميزات عديدة أهمها إنه مطاطي تشده وترده تمطه يلسع يوجع ويرجع وسياسة الأستك فكر ونظرية يعتبرها البعض عبقرية والبعض الاخر يشوفها خيبة أمل والإخوان أسعد الناس بنظرية الأستك وشده , في كل البلاوي والمصايب اللي احنا فيها فتش عن الأستك وشده في المواقف المختلفة وأما يوجع ويلسع الشعب والمعارضة مش مشكلة يرجع شوية ونخففه حبة حبة لحد الوجع ما يخف ويعدي ونرجع نشده تاني ,

هكذا تدار مصر الحبيبة , المصيبة إن النظرية دى تنفع في إدارة عزبة ولا تكية تشد عالعمال فيها والفواعلية واللي عايشين بالأجرة واليومية لكن ما ينفعش مع وطن وشعب له حق زي أصحاب الأستك بالظبط ما ينفعش الإخوان يتشددوا في كل حاجة و ياخدوا البلد لآخر الخيط وأقصى التطرف في الطلبات والرغبات وفرض الرأي وأما الناس تقول آي آي وهتقطع الأستك وتتحرق البلد الإخوان يقولوا معلش تعالوا بيوجعكوا في إيه الأستك نخففه شوية ,

الإخوان وجعوا الدنيا بالدستور أولا في مارس 2011 وبندفع تمنه للنهارده والإخوان وجعوا البلد في ضرورة إعادة مجلس الشعب المنحل بعد استلام كرسي الرئاسة مباشرة وأما القضاء قال ما ينفعش قلبوا الدنيا عالدستورية وخونوها وطلعوها من الدستور الجديد بلبوص ناقصة تلت أعضاءها , والإخوان شدوا الأستك لآخرة في إقالة النائب العام السابق أول مرة ورحلوه للفاتيكان وأما ثار القضاء رجعوه لكن حطوه في دماغهم ,

وعشان حكاية الأستك عاجباهم أوي شدوه لآخره في الإعلان الدستوري اللي حرق البلد وأما خلاص هيتقطع الأستك قالوا تعالوا حوار وطني الحقنا يا د. عوا يا مُحلل ولغوه , بس أهم حاجة يمر الدستور على جثة اللي مش عاجبه , وشدوا في ليلة ضلمة في تكية التأسيسية إقرار كل المواد على حسب الكيف والمزاج وطلع المحلل يهلل ويقول تحيا الدستور والتصويت عليه ,

الإخوان شدوا الأستك تاني في تلبيس العمة لمجلس الشورى وخلوه يشرع رغم ان الشعب نفسه ما اختارش ولا انتخب حد منهم للتشريع وزي ما الدنيا مصالح دخل المجلس قطيع من التأسيسية مكافأة شد الأستك ورد المجلس الجميل بقانون انتخابات مجلس نواب تفصيل عالمزاج وضمان الأغلبية وأما الدنيا ولعت والناس زهقت وطهقت وهتشق الهدوم وهتقطع الأستك رجعنا تاني لنظرية إرخي الأستك يا عم خفف يا سيدي ,

العملية ماشية آخر حلاوة نشد ونرخي ادعي بسرعة لإجتماع وطني تاني نحضره ونرمي لهم عضمة ولا اتنين نوافق على أعادة تعديل مادتين في قانون الإنتخاب ونوافق على شروة إحالة طلب تعديل لبعض مواد الدستور للمجلس الجديد وهو ومزاجه يقبل ولا يرفض يصوت ولا نصوت عليه وطالما الأغلبية معانا يجرا إيه نرمي العضمة للكلاب يمصمصوها وإحنا بتوع النهش في اللحمة وبتوع الضاني والثمين ما حدش هياخد منا حتة ولا فتفوته ,

طيب طالما فيه مواد في الدستور عورة وعاوزه اللي يسترها كان إيه لزمته العجلة وإيه لزمته شد الأستك ولما فيه مادتين في قانون الإنتخابات شايفين إنهم عيب ويكسفوا طب ما كان م الأول بلاها المادتين دول طالما كنا متفقين عليهم في اجتماع وطني وطنشناه , لزمة الشد إيه هو لازم تجربوا الأستك هيوجع وألا لأ هو لازم نشوف الناس دي بتحس ولا جتتها نحست هو لازم لعبة القط والفار ,

المهم في الحكاية دي كلها مين اللي بينفذ اللعبة الحلوة دي ومين اللي بيشد ويرجع يدعو للحوار مين المربوط بطلبات الجماعة اللي بينفذ النظرية مين اللى مكبل برغبات مكتب الإرشاد اللي شغلته مسك الأستك و شده ومين اللي بيدعي لحوار معروف مقدما ان أقصى حاجة فيه هي حتتة العضمة مفيش غيرها أي حتة لحمة خدتها الجماعة وداقت طعمها لا يمكن هتسيبها , عارفين الحتة الجديدة إيه ضمان أغلبية في إنتخابات مجلس النواب بأي طريقة فمفيش حاجة اسمها حكومة إنقاذ وطني ولا فيه حاجة إسمها إلغاء مواد دستور لكن فيه حتة عضمة بتشكيل لجنة تطلع كام مادة مش هيوافق عليهم أغلبية التلتين في مجلس النواب اللي هتتم انتخاباته في ميعادها واللي هيتم بنفس الطريقة ونفس التفكير ويولع الشعب اللي بيتظاهر مع الشرطة ويموتوا بعض وإحنا مالنا حيلهم بينهم اللهم رد الظالمين اللى مش عايزينا دلوقتي بالظالمين اللي حبسونا زمان بركة يا جامع نخلص من الإتنين إيه يعني كام واحد مات من الناحية دي وألا الناحية دي اللهم زد وبارك ,

الأوامر دلوقتى استخدام العنف من الشرطة عشان المتظاهرين يردوا بعنف تاني ويتشغلوا ببعض ونرجع نصحى على انتخابات طاهرة لمجلس النواب زي اللي فاتت بالظبط وتمت ليلة أحداث محمد محمود أصلها بركة وبنتفاءل كل ما يزيد الضحايا يزيد أصواتنا في الصندوق , والقتل شغال بينهم يالا بينا احنا نعمل مليونية الخير ناكل بها عقل الغلابة في القرى والريف اللي بعيد عن الضرب والقتل و نعمل لنا كام شادر لحمة على كام معرض مواد غذائية بأسعار رخيصة على كام قافلة طبية وعلبتين دواء وكام عملية جراحية وازرع شجرة تحلب بقرة وربنا يخلى الأستك واللي مربوط بيه واللي بيشده ويرخيه .

اضغط على الكلمات المفتاحية التالية، للإطلاع على المقالات الأخرى المتعلقة:

مصر، الثورة المصرية، الإضطرابات في مصر،

2-02-2013

لوضع رابط لهذا المقال على موقعك أو بمنتدى، قم بنسخ محتوى الحقل الذي بالأسفل، ثم ألصقه

رابط المقال

لإعلام أحدهم بهذا المقال، قم بإدخال بريده الإلكتروني و اسمك، ثم اضغط للإرسال

البريد الإلكتروني

اسمك